السلام عليكم متابعينا الأعزاء
ازاي اعاقب ابني يعني ميتضربش ؟
طبعا لأ
ولا ازعق له ؟
لأ ، طب و لية !
طيب هقلب وشي عليه مهو لازم يعرف ان كدة غلط و كخ ،
طب هيتعلم ازاي الغلط من الصح !! 
هتلاقي الإجابة في سؤالك نفسه 
هيتعلم ازاي ؟! مش هيتعاقب ازاي علي الغلط اللي عمله !!
- حضرتك خلفتي طفل ، عبارة عن صفحة_بيضاء كل فعل هيقوم بيه يوميا هو عمل جديد عليه ، تجربة جديدة ، بيعملها بغرض انه يكتشف قدرات نفسه و بغرض اكتشاف كل المحيط بيه مش بغرض انه يغلط ويستفزك العقاب عمره مهيكون اساس التعلم ، لكن الحب هو اساس التعلم و زرع القيم و زرع الصح و الغلط ، جربي تتجنبي فكرة العقاب اولا و حطي مكانها فكرة التعلم اولا ..
- اعرفي سبب فشله ، سبب عنده و حاولي بأسلوبك و حبك تعلميه ازاي ينجح ، ازاي يشرب ، ازاي ياكل ، ازاي يلعب و عرفيه نتيجة الغلط اللي عمله و كوني دايما معاه مش عليه و متسمحيش لأي حد انه يزعله او يزعقله او يدايقه ، ومتسمحيش لنفسك بمقارنته حتي بينك و بين نفسك بلاش تمسكي في كل غلطة و تكبريها ، انتي كدة بتزودي البلة طين ، و بتحسسي طفلك ان كل افعاله غلط ، و اول حاجة هيعملها معاكي لما يكبر انه هيتعلم ازاي يمسكلك علي غلطة و ينتقدك و ساعتها هتفلت منك زمام الأمومة و التربية لإن الأساس مكنش غرضه التعلم و الحب كان غرضه السيطرة و العقاب و فرض القوة .
لاتنسوا مشاركة هذا المقال مع أصدقائكم لتعم الفائدة ولكم التعليقات