السلام عليكم متابعينا الأعزاء
هل طفلك محتاج كالسيوم ولا لأ ؟
- الطفل في أول سنه من عمره مش محتاج كالسيوم لأن الكميات اللي هو بيحتاجها متوفرة في لبن الأم او اللبن الصناعى
- فقط فيتامين د في صورة الفيدروب ٤ نقط (٤٠٠ وحدة دولية) يومياً لإن وظيفته إنه بيساعد على إمتصاص الكالسيوم من الأمعاء و توصيله للعظام وكده يبقى استفدنا إستفادة كاملة من الكالسيوم الموجود في الحليب الطبيعي أوالصناعي.
طيب وبعد السنة ؟
احتياجات الطفل اليومية للكالسيوم بتزيد طبعا وكمان كمية اللبن اليومية اللي بياخدها الطفل في اليوم بتقل و الأكل بيزيد ، طيب هنعمل ايه ؟
- لازم تقدمي أكل صحي لطفلك يحتوي على الكالسيوم زي منتجات الألبان من حليب و زبادي و الأجبان بالذات القريش و الشيدر (على فكرة سواء كامل الدسم أو خالي الدسم كله فيه نفس نسبة الكالسيوم) ، لكن لا يفضل خالي الدسم قبل عمر السنتين.
- الأطفال اللي مش بيحبوا منتجات الألبان ممكن نديهم الأكل الغني بالكالسيوم زي فول الصويا و اللوبياء والبروكلي والبرتقال و البيض والتين و القراصيا و اللوز و السمسم و الحبوب الكاملة زي القمح (البليلة).
- الحاجات الغنية ب فيتامين د .. زي البيض و التونة و سمك السردين ، كل الحاجات دي بتزود إمتصاص الكالسيوم ، كمان هنستمر على الفيتامين د زي الفيدروب (٦٠٠ وحدة دولية) ٦ نقط يوميا.
ملحوظة مهمة الكالسيوم لا يعطي الا بتحليل دم يثبت وجود نقص في نسبته بالدم
لاتنسوا مشاركة هذا المقال مع أصدقائكم لتعم الفائدة ولكم التعليقات