السلام عليكم متابعينا الأعزاء
الغيرة بين أطفالك بعد وصول المولود الجديد
موضوع شائك يا جماعة ، و بيبدأ من و إنت حامل في المولود الثاني و ليه ٣ مراحل تعالوا نتعرف عليهم ونعرف نتعامل أثنائهم إزاي
المرحلة الأولى تبدأ من أول ما تعرفي إنك حامل
- نمهد له الموضوع
- نوضح الفكرة أكتر في دماغه
- ندعم عنده الإحساس بالمسؤلية
المرحلة الثانية يوم الولادة
- لو مخططين إنه ما يكونش معاكوا في اليوم دا وهاتسيبوه في مكان ياريت يكون مكان مألوف ليه و مايحسش فيه بغربة
- و لو هاتسيبوه عند حد هو ما يعرفوش ياريت قبل اليوم دا تعرفوه بيه وتحاولوا تقربوه منه ...
- كمان لو في عمر يسمح إنه يستوعب الكلام لازم نشرح له بالظبط إيه اللي هايحصل و المخطط ليه في يوم الولادة و تجهزوه نفسياً كويس علشان ما يتعرضش إنه يعيش يوم سيئ و كل دا علشان بسلامته يشرف ودا هيكون ليه وقع سيئ على بسلامته طبعًا
المرحلة الثالثة بعد الولادة
نركز سوا علشان دي أهم مرحلة
طبعاً دخول مولود جديد البيت بتكون من أسوأ التجارب اللي بيمر بيها الطفل اللي موجود في البيت عشان بيحس إن في كائن جاي يهزه من على عرشه و دا ممكن يعمل تغير و تحول جذري في شخصية الطفل الكبير كالٱتي
- اللي بطل يرضع من الببرونة هايرضع منها تاني
- اللي بطل ياخد التيتينة هايطلبها تاني
- اللي قلع البامبرز هايرجع يعمل على نفسه تاني
- و في اللي إتعلم المشي و يبطل يمشي و عايز يتشال طول الوقت
- ممكن يتحول لشخصية عدوانية و يضرب أو يقرص أو يوقع أخوه الصغير
قبل ما تغضبي عليه - إسألي نفسك هو بيعمل كده ليه ؟
هو بس عايز يلفت إنتباهك - بيقولك أنا أهه أنا موجود ما تنسينيش مسكين صح !!!
طيب نعمل إيــــــه في المشكلة دي ؟
- نخليه يشارك في العناية بالمولود - يعني مثلا يناولك البامبرز او يشيل فوطة - خليه يشيله لو طلب بس تحت إشرافك طبعاً - كمان نخليه يلاعبه و يضحكه لما المولود يكبر شوية و عرفيه إن أخوه بيضحكله عشان بيحبه - صدقيني هايبهرك وهايكون متحمس جداً ، بس لو رفض و حاول يتجاهل وجود اخوه أو أخته إعرفي إنه لسه مش مستعد - ما تضغطيش عليه و إعرضي عليه الأمر في وقت تانى.
- معروف إن حديثي الولادة بكائهم كتير - متخليش دا يلهيكي عنه - هو مش هايفهم كلمة أخوك الصغير بيعيط - ما هو كمان صغير و محتاجك - حاولي تقضي الوقت اللي المولود نايم فيه معاه تلعبوا - كمان ممكن تخلي حد ياخد باله من الصغير وقضي إنت وقت معاه.
- ممنوع منعاً باتاً إجراء مقارنة من أي نوع بين الطفلين - كل طفل له شخصيته المستقلة - بلاش بقى دا أحلى دا أفتح - بيفهموا والله وبيشيلوا جوا نفسهم.
- زي ما عرفنا ان الطفل ممكن يرجع خطوة لورا يعني ممكن يرفض الأكل وعايز يرضع أو يرجع يتبول على نفسه - ما تتعصبيش و ما تتنرفزيش و خدي الموضوع بهدوء ملوش لازمه تعملي حرب مش وقت تعليمات وقوانين هو مش ناقص - ودا مش مرض لا قدر الله دي غيرة و فترة وهتعدى.
- ما تسيبيش إبنك الكبير مع الصغير أبداً لوحدهم و دا من غير ماتحسسي الكبير انك خايفه منه طبعاً - ولو حصل و ضرب أو قرص المولود الجديد إعرفي إنه عايز يلفت انتباهك حتى لو هتعاقبيه - عشان كده لو دا حصل مطلوب منك تتجهي للمولود و تهديه و تتجاهلي الكبير تماماً و تفهميه إن الضرب و القرص دا مرفوض و غلط إنتقدي الفعل بس وشوية شوية هيلاقي إن مفيش فايده من اللي بيعمله و بتجيب نتائج عكسية وهايبطل
لاتنسوا مشاركة هذا المقال مع أصدقائكم لتعم الفائدة ولكم التعليقات