السلام عليكم متابعينا الأعزاء
اليكى بعض النصائح المهمة لطفلك الجديد
- أول ما الطفل يتولد ممكن يقعد إسبوعين تلاته هادي و نايم ، مطلوب من حضرتك تصحيه بأي وسيلة و ترضعيه لإن سكره ممكن ينزل و دا خطر على حياته في المرحلة دي.
- بعد الأسابيع الأولى هتلاقيه بيصرخ و يعيط و يلم عليكي الخلق ، معلش استحمليه الفترة دي لسه جديد و مش متعود على الضوء و الأصوات و درجات الحراره المتغيرة و اللمس و الهدوم ، كل دا جديد عليه و بياخد وقت لغاية ما يتعود يمكن أول ٣ الى ٤ شهور وعلشان كده هتلاقيه نضيف و راضع و زي الفل بس مش مبطل صريخ و ما عليكي غير الصبر.
- لو هترضعيه طبيعي إعملي حسابك إن الرضاعة حسب الطلب مش شرط كل ساعتين و من فضلك تهتمي بالنظافة الشخصية و كمان بلاش ريحة البرفانات النفاذة علشان حاسة الشم عنده قوية جداً و الحاجات دي بتخليه مقريف طول الرضاعة.
- لو ناوية ترضعيه طبيعي نقلل القهوة أو النسكافيه علشان الحاجات دي بتنزله في اللبن و بتعصبه ، و ياريت تبعدي عن التوابل الحارة و أي حاجه مشهور عنها إنها بتعمل غازات زي الكرنب و القرنبيط و البروكلي لإن كل دا هاييجي على دماغك في الٱخر.
- لو هترضعيه صناعي نظمي رضعاته كل ساعتين تلاته على الأقل أول ٣ شهور بعد كده عند الطلب و الرضعة تتعمل بماء مغلي و متبرد و تتقدم دافيه و لو بيحبها بارده مفيش مشكله.
- ما تنسيش بعد كل رضعة أو رضعة و رضعة تجيبي قطنة مبلولة ماء دافئ و تمسحي تحت دقنه و رقبته من فوق و تحت الإبط و تنشفي الاماكن دي بعد كده بقطنة ناشفه علشان ما تتفاجئيش بالإلتهابات و تسلخات منظرها وحش.
- هدوم الطفل من فضلك تغسليها بمواد رائحتها مش نفاذة علشان زي ما قلتلك حاسة الشم عنده قوية و الروائح القوية سواء حلوة أو وحشة بتؤذي جيوبه الأنفية و بتخليه مش قادر يشم رائحتك اللي متعود عليها و بتحسسه بالأمان و دا بيؤدي بالتالي إلى القريفة و الصراخ المتواصل و كله برده هاييجي على دماغك في الٱخر.
- من فضلك ما تسيبيش البامبرز مليان فترة طويلة على جلده علشان التسلخات و إغسلي له بماء دافئ كويس و لو سمحتي بلاش أي نوع من أنواع بودرة التلك ذراتها بتدخل في الأنف و ممكن تسبب حساسية في الصدر على المدى الطويل ، إستخدمي كريمات الأطفال المحتوية علي اكسيد الزنك.
لاتنسوا مشاركة هذا المقال مع أصدقائكم لتعم الفائدة ولكم التعليقات